Góðverkavikan með börnum í Akureyrarkirkju.

Vikuna 8. – 12.júní héldum við í Akureyrarkirkju GÓÐVERKAVIKU fyrir krakka í 4. – 6. Bekk. Börnin mættu klukkan 9:00 og voru til kl. 12:00.

Verkefni vikunnar sneru að góðverkum af ýmsu tagi. Fyrsta daginn var farið í hópeflileiki og spil til að þjappa hópnum saman og hrista feimnina úr þeim. Gleðikort voru unnin af og til yfir vikuna þegar tími gafst til. Á þau voru skrifuð falleg orð og setningar og svo var teiknað og föndrað eins og hugur þeirra listi.  Á föstudeginum voru kortin svo gefin niðrí bæ, þar sem börnin gáfu búðarstarfsmönnum kort sem og vegfarendum. Börnin fengu miklar þakkir fyrir þessi fallegu kort sem glöddu og þótti þeim gaman að gefa.

Annað skemmtilegt verkefni sem börnin unnu í vikunni var að semja brúðuleikrit fyrir leikskólabörn og sýna þau. Börnin höfðu frjálst val um efni leikritanna og fékk sköpunargleði þeirra að njóta sín. Til okkar komu svo 50 leikskólakrakkar með kennurum sínum að horfa á 5 stutt leikrit. Einnig sungum við saman nokkur sunnudagsskólalög.

Á einum sólardeginum fór hópurinn í Lystigarð Akureyrar þar sem börnin fengu að snyrta beð. Forstöðumaður garðsins var mjög þakklátur fyrir þetta góðverk. Einnig borðuðu börnin nesti og farið var í nokkra leiki.

Þessi vika einkenndist af allskonar góðverkum og skemmtilegheitum með fjölbreyttum leikjum fyrir krakkana sem og bingói sem haldið var síðasta daginn. Í kveðjustundinni  fengu allir smágjöf frá kirkjunni og risa knús!  Daglega fórum við með mismunandi bænir og lásum framhaldssögu um hamingju. Góð umræða varð einnig um góðverk almennt svo börnin ættu að vera einhvers vísari um góðverk og vonandi temja sér þau eins oft og hægt er.

Sonja Kro, æskulýðsfulltrúi Akureyrarkirkju.

About Sonja Kro (17 Articles)
Ég heiti Sonja Kro og starfa nú sem æskulýðsfulltrúi Akureyrarkirkju ásamt því að vera starfsmaður Eyjafjarðar - og Þingeyjarprófastsdæmis. Ég hóf störf í ágúst 2018. Ég er menntaður leikskólakennari og hef starfað sem slíkur á Akureyri í 21 ár. Ég er búsett á Akureyri, en er ættuð frá Grenivík og Noregi :)
%d bloggurum líkar þetta: