Eyjafjarðar- og Þingeyjarprófastsdæmi

Hér birtist sálmur eftir Guðmund Guðmundsson, héraðsprest, jóla- og nýjárskveðja til samstarfsfólks á kirkjulegum vettvangi og til uppörvunar og hvatningar á nýju ári. Sálmurinn gæti eins heitið Ljós jólanna. Hann er bæn um að við mættum vera ljós í heimi, endurskin frá frumglæði ljóssins.

„Sú þjóð sem í myrkri sat, sá mikið ljós. Þeim sem sátu í skugglandi dauðans, er ljós upp runnið“ (Mt. 4.16).

Hlusta á lagið:

Ljós Guðs anda

Guð faðir lof og þökk sé þér
sem þínar gjafir veitir mér.
Það allt sem þarf ég þigg ég frá
þér, þinnar náðar njóta má.
Þú lætur himna ljósið þitt
svo lýsa yfir fólkið mitt
að unum við glaðvær öll við sitt.

En þegar skýin skyggja á
það skin sem bjart þér stafar frá,
þá bið ég soninn þinn með þrá
mig þvílíku’ myrkri frelsi frá.
Ég ástúð sé í augum hans
sem alla þjáning syndarans
bar ljúfur á krossi’ í líking manns.

Með börnum þínum biðja vil
að betur leyndardóminn skil,
að þjáning Drottins vísar veg
til visku ljós að sjái ég.
Það ljós Guðs anda ljáðu mér
að lifi ég þér eins og ber
og andlit mitt skíni skært af þér.

Guðm. G.